Ida bygger nytt av mykje gammalt

Ei gamal stove som juvelen i hytta

Den gamle lafta stova frå før 1850 er sjølve juvelen i den heilt spesielle hytta. Stova kjøpte Ida og Guttorm Berqvam frå vener som hadde ho ståande på tunet i Årdal i Jølster. Handverkar Torgeir Årdal plukka ho ned, reparerte einskilde delar og sette ho saman igjen på den nye tomta ved fjorden.

I tillegg bygde Årdal tre grindbygg i verkstaden sin i Årdalen – bygg som er fletta saman med den gamle stova til ei heilskapleg hytte på over 120 kvm. Trass i storleiken kjennest ho koseleg og lun. Eg ville ikkje ha ei slik prangande Geilo-hytte, aldri i verda! Hytta har tre soverom, ein romsleg hems, to bad, badstue, kjøkken, vaskerom og den flotte sperrestova – kvar minste detalj gjennomtenkt.

Lokal handverkskompetanse i verdsklasse

Ida Berqvam er mest kjend for utbygginga av handelshus i Førde, men ho er også utdanna arkitekt og har teikna rundt 50 hus. Ho har lenge hatt lyst til å samarbeide med Torgeir Årdal, og då ho fekk kjøpe den gamle stova, baud sjansen seg endeleg.

«Torgeir har gjort eit fantastisk flott arbeid! Eg samarbeider berre med flinke folk, lokale handverkarar. Vi må ikkje gløyme at vi har utruleg mykje kompetanse rundt i bygdene våre – handverkskompetanse som vi er heilt avhengige av.»

Årdal nytta mellom anna kne av fururot for å stive av og støtte konstruksjonen – ein gamal teknikk som er like god i dag som han alltid har vore: både pen og praktisk.

Sigdal-kjøkkenet: rett val frå første augekast

Ida likar å kjøpe rimelege skap og setje sitt eige preg på dei med fargar og knottar. Då ho skulle finne kjøkkenet til hytta, tok ho utgangspunkt i eit skap med glasdører ho alt hadde – og fann det ho leita etter i Sigdal-butikken til Gravdal Bygg.

Kjøkkenet er ikkje stort, men rommar både ei lita integrert oppvaskmaskin og godt med oppbevaringsplass. Den neddempa fargen passar perfekt saman med svarte detaljar, og profilane er minimale – akkurat slik ho ville ha det.

«Eg er kjempefornøgd med Sigdal-kjøkkenet! Den neddempa fargen passar perfekt til svarte detaljar. Eg har ikkje angra, og ville gjort det same valet igjen.»

Livet inn i interiøret – ein livsfilosofi

Ei fele ho fekk av bestefar sin, gamle familiefoto og bilete som for lengst hadde hamna i kjellaren er henta fram og har fått nytt liv. Familiefoto av far, onkel, Ida sjølv og eit søskenbarn er overført til lerret og lagar god stemning i hytta. Ein lampeskjerm mora kjøpte på ein Italia-tur er ramma inn og pyntar opp den solide tømmerveggen.

Ein stoffrest frå plantasjen dei eig i USA har blitt til gardiner og gjeve nytt liv til ein gammal stol. Gardinene på det eine soverommet vart kjøpte det året Ida gifta seg – for snart 50 år sidan. Eit stort tuntre frå garden heime på Falkenstein er forvandla til eit solid langbord.

«Når du ser i interiørmagasin er alt heilt likt og preglaust. Eg bryr meg ikkje om trendar – ein må ta med seg livet inn i interiøret. Eg kastar aldri noko, og det har vorte ein livsfilosofi.»

Ei hytte som glir inn i naturen

Hytta ligg i eit utruleg flott område ved Hestadfjorden. Tanken er at den gamle stova og grindbygga skal opplevast som ei samling småhus som har vakse fram naturleg på staden.

Kledningen er av eit materiale som skal aldast med verdigheit, og med torvtak glir heile anlegget rett inn i naturen rundt. Store vindauge med svarte lister rammar inn eventyrskogen ned mot vatnet – eit møte mellom ute og inne som set stemninga i heile hytta.